“Azərpoçt” Məhdud Məsuliyyətli Cəmiyyəti (MMC) Azərbaycanın milli poçt operatorudur və ölkə daxilində poçt və maliyyə xidmətləri göstərir. 1993-cü ildən Ümumdünya Poçt İttifaqının üzvüdür.
Azərbaycanda müasir poçt xidməti XIX əsrin birinci yarısında formalaşmağa başlayıb. 1818-ci ildə Gəncə şəhərində ilk poçt kontoru açılıb. Müstəqillik dövründə, 6 oktyabr 1918-ci ildə Azərbaycan Demokratik Respublikasının hökumətində Poçt və Teleqraf Nazirliyi yaradılıb. 1991-ci ildə Sovet İttifaqının dağılmasından sonra poçt rabitəsinin inkişafı çətinliklərlə üzləşsə də, 1997-ci ildən etibarən müstəqil qurum kimi fəaliyyətə başlayıb və inkişaf mərhələsinə qədəm qoyub.
Fəaliyyət sahələri hansılardır?
“Azərpoçt” MMC-nin əsas məqsədi əhaliyə və müştərilərə yüksək keyfiyyətli poçt və maliyyə xidmətləri göstərməkdir. Əsas fəaliyyət istiqamətləri aşağıdakılardır:
Poçt xidmətləri:
Poçt məhsullarının (poçt nişanları, digər filateliya məhsulları və s.) hazırlanması və satışı.
Ümumi istifadədə olan poçt rabitəsi xidmətləri (universal, sürətli, kuryer və s.);
Xüsusi təyinatlı poçt rabitəsi xidmətləri;
Dövri mətbuatın abunəsi və satışı;
Teleqraf göndərişlərinin qəbulu və çatdırılması;
Dövlət poçt ödəniş nişanlarının buraxılması;
Maliyyə xidmətləri:
Nağd pulun və digər qiymətlilərin inkassasiyası.
Poçt hesablarının açılması və aparılması;
Pulköçürmələrinin həyata keçirilməsi;
Maliyyə təsisatlarında müxbir hesabların açılması;
Poçt əmanətlərinin qəbul edilməsi;
Ödəniş vasitələrinin, o cümlədən debet və kredit kartlarının, poçt çeklərinin buraxılması;
Xarici valyutanın alqı-satqısı;
Həmçinin Azərpoçtun debet kartları mövcuddur.
Strukturu və əhatə dairəsi
“Azərpoçt” MMC-nin strukturu aşağıdakı bölmələrdən ibarətdir:
- “Azərexpresspoçt” Respublika Müəssisəsi;
- “Poçt Daşıma Mərkəzi”;
- Mərkəzi Xüsusi Rabitə İdarəsi.
Şirkət, 35 poçt filialı və bütün ölkəni əhatə edən poçt şöbələri ilə xidmət göstərir.
Fevral 2025-ci ildə “Azərpoçt” MMC Şuşa şəhərində yeni poçt məntəqəsi açıb. AZ5800 indeksli bu filial, Zəfər küçəsindəki Dövlət Xidmətləri Mərkəzində yerləşir və universal poçt xidmətləri, maliyyə yığımları və karqo xidmətləri təklif edir. Filialın iş rejimi bazar ertəsi – şənbə günləri saat 09:00 – 17:00, bazar günləri isə 09:00 – 16:00 aralığındadır
“Azərpoçt” MMC-nin baş ofisi Bakı şəhəri, Ü.Hacıbəyov küçəsi, 72 ünvanında yerləşir.
