Təhsil Nazirliyinin və Dövlət İmtahan Mərkəzi tərəfindən hazırlanmış qərarlara əsasən I və III ixtisas qruplarında bəzi ixtisaslar üzrə imtahan fənnlərində müəyyən dəyişikliklər edilmişdir. Belə ki, universitetlərə qəbul imtahanlarında abituriyentlər artıq III qrup üzrə coğrafiya fənnindən, I qrup üzrə isə informatika fənnindən imtahan verməli olacaqlar.
2022-ci ildən etibarən III ixtisas qrupuna daxil olan ixtisaslar dil-tarix (DT) və tarix-coğrafiya (TC) altqruplarına bölünəcəkdir. TC altqrupuna daxil edilən “Beynəlxalq Münasibətlər” və “Regionşünaslıq” ixtisaslarının müsabiqəsində iştirak etmək istəyən abituriyentlər imtahanın II mərhələsində Azərbaycan (rus) dili və tarix fənləri ilə yanaşı, coğrafiya fənnindən imtahan verməlidirlər. Həmçinin, DT altqrupuna daxil olan digər ixtisasların müsabiqəsində iştirak etmək istəyən abituriyentlərin isə ədəbiyyat fənnindən imtahan verməsidə nəzərdə tutulur. Hər iki altqrupa daxil olan ixtisasların müsabiqəsində iştirak etmək istəyən abituriyentlər isə II mərhələdə Azərbaycan (rus) dili, tarix və ədəbiyyat fənləri üzrə imtahan verdikdən sonra əlavə olaraq, coğrafiya fənnindən fərq imtahanı verməlidirlər. Yekun nəticə olaraq, abituriyentlər universitetlərə qəbul zamanı təhsil almaq istədikləri ixtisaslara uyğun olan, iki altqrupdan birini və yaxud hər iki altqrupu seçmək imkanına malik olacaqlar.
Abituriyentlər Nələrə Diqqət Etməlidirlər?
I qrup üzrə edilən dəyişikliklər yanlış anlaşılmışdır. Bu qrup üzrə ixtisas fənlərindən Kimya fənni çıxarılmamışdır. Edilən dəyişiklik ondan ibarətdir ki, abituriyentlərin kimya və ya informatika fənnini ixtisas seçimində seçmək imkanı olacaqdır. Belə ki, abituriyentin seçdiyi ixtisas informatika yönümlüdürsə, bu zaman həmin abituriyent informatika fənnindən imtahan verməli olacaqdır. Eləcədə abituriyentin seçdiyi ixtisas kimya yönümlüdürsə, kimya fənnindən imtahan verməlidir. Əgər abituriyentin seçdiyi ixtisas hər iki fənn üzrə yönümlüdürsə, bu zaman isə hər iki fənndən də imtahan verməlidir. Bal şkalası üzrə eyni qayda ilə 700 bal olaraq qalır. Hər iki fənndən imtahan verildiyi halda belə, kimya yönümlü ixtisaslarda kimya fənninin balı, informatika yönümlü ixtisaslarda informatika fənnin balı nəzərə alınaraq hesablanacaqdır.
Bu qayda III qrup ixtisas fənnlərində də eynilik təşkil edir. Abituriyent “Beynəlxalq Münasibətlər” və “Regionşünaslıq” ixtisasını seçmişsə, coğrafiya fənnindən imtahan verməli olacaqdır. Bu zaman ədəbiyyat fənninin balına ehtiyac qalmayacaqdır. Əgər abituriyent ədəbiyyat fənnindən imtahan verməyibsə, bu iki ixtisasdan başqa ixtisas seçə bilməyəcəkdir. Abituriyentlər bu iki ixtisası seçmək üçün isə mütləq şəkildə coğrafiya fənnindən imtahan verməlidirlər. Hər iki fənndən imtahan verildiyi halda isə bütün ixtisasları seçmək şansı olacaqdır.
