Ərizə Nədir?
Ərizə – şəxsin müəyyən bir mövzuda düşüncə, şikayət və ya istəklərini nəzərdə tutan müəyyən formaya malik və rəsmi şəkildə yazılan müraciət formasıdır. Ərizə forma olaraq məzmununa görə iki şəkildə – şikayət xarakterli və xahiş etmək məqsədi ilə yazılır. Əslində ərizələr müxtəlif formalara malik olsa da, məzmunca eyni cürdür.
Ərizə Necə Yazılmalıdır və Nələrə Diqqət Edilməlidir?
İlk növbədə ərizənin başlıq forması yəni, kimə və kimdən yazılması dəqiq bir şəkildə qeyd edilməlidir. Ərizənin məzmunu qısa və son dərəcə peşekar şəkildə yazılmalı, faktlar isə konkret olmalıdır. Ərizəni ərizəçi öz xətti ilə yazmalı və ərizənin sonunda gün, ay, il və yazan şəxsin imzası qeyd olunmalıdır. Ərizənin yazılış formasını isə ümüumi şəkildə belə qeyd edə bilərik:
- Vərəqin əvvəlində, abzasdan böyük hərflərlə təşkilatın adı və kimə müraciət edilirsə, həmin şəxsin adı, atasının adı və soyadı qeyd olunmalıdır.
- Sətrin 1/2 hissəsi həcmində, vərəqin sağ tərəfində kimdən sualını verməklə ərizəçinin adı, soyadı və atasının adı göstərilməlidir.
- Vərəqin ortasında böyük hərflə “Ərizə” sözü qeyd olunur.
- Yeni sətrin əvvəlindən isə qısa, aydın və konkret şəkildə ərizəçinin müraciəti şərh olunur.
- Yekun olaraq ərizənin sonunda imza çəkilir və onun yazılma tarixi göstərilir.
Ərizənin Formasına Aid Nümunə
Azərbaycan Dövlət İqtisadiyyat Universitetinin İqtisadiyyat fakültəsinin dekanı cənab A.A.Quliyevə həmin universitetin İqtisadiyyat fakültəsində təhsil alan Ayan Məmmədova Kamil qızı tərəfindən
Ərizə
Yazıb sizdən xahiş edirəm ki, mənim 16.02.2022 tarixindən etibarən bir semestr müddəti ərzində “Mevlana” Mübadilə Proqramında iştirak etməyimə icazə verəsiniz.
İmza: Məmmədova Ayan Kamil qızı
Tarix: 01.02.2022
Tərcümeyi-Hal Nədir?
Tərcümeyi-Hal forması fərd haqqında tam və dolğun məlumatları özündə əks etdirən bir rəsmi sənəddir. Bu sənəd formasını adətən rəsmi dövlət orqanları, iri şirkətlər və ya qurumlar tərəfindən işə daxil olarkən müraciət edən şəxs tərəfindən təqdim edilməsi tələb olunur. Tərcümeyi hal formasınıda ərizə sənədində də olduğu kimi, hər bir şəxs tərəfindən öz xətti ilə yazılmalıdır. Sənəd formasında özünüz haqqında olan bütün məlumatlar qısa, aydın və ardıcıl şəkildə şərh olunmalıdır.
Tərcümeyi Hal Necə Yazılmalıdır və Nələrə Diqqət Edilməlidir?
Tərcümeyi Hal formasını yazarkən aşağıdakılar nəzərə alınmalıdır:
- Ad və soyad
- Doğulduğunuz il və yer
- Məktəbə daxil olduğunuz və bitirdiyiniz il
- Ali məktəbə qəbul olunmusunuzsa, daxil olduğunuz il və bitirdiyiniz il
- İşlədiyiniz yer və vəzifələr
Tərcümeyi Halı yazarkən ailə üzvləriniz, evlisinizsə yoldaşınız və uşaqlarınız haqqında da ətraflı məlumatları qeyd etməlisiniz. Sənəddə xüsusi bir şəkildə bütün məlumatları ardıcıl olaraq şərh etməyə diqqət etməlisiniz. Yazıda bütün məlumatları konkret bir şəkildə, heç bir artıq sözdən istifadə etməyərək qeyd etməli və yazarkən qrammatik səhvlərə yol verməməlisiniz. Tərcümeyi hal A4 formatlı vərəqdə adətən əl ilə yazılır və “Mən, adım, soyadım..” şəklində başlanılır. Və yekun olaraq sənədin sonunda adınız, soyadınız, imzanız və tarix qeyd olunur.
Tərcümeyi-Hal Formasına Aid Nümunə
Mən Ayan Kamil qızı Məmmədova 2000-ci ildə Bakı şəhərində anadan olmuşam. 2006-ci ildə Sabunçu rayonu 170№-li orta məktəbin 1-ci sinfinə daxil olmuşam və həmin məktəbi 2017-ci ildə bitirmişəm.
2017-ci ildə Azərbaycan Dövlət İqtisad Universitetinin İqtsadiyyat fakültəsinə daxil olmuşam və 2021-ci ildə həmin universitetdən məzun olmuşam.
Universiteti bitirdikdən sonra müxtəlif yerlərdə təcrübə proqramlarında iştirak etmişəm və 01.10.2021-ci ildən etibarən isə Accessbankda menecer vəzifəsində çalışıram.
Atam- Kamil Əhməd oğlu Məmmədov sahibkar vəzifəsində çalışır.
Anam- Nazilə Əli qızı Məmmədova evdar xanımdır.
İmza: Ayan Kamil qızı Məmmədova
Tarix: 11.11.2021
