COVİD-19 səbəbiylə təhsilin qlobal olaraq dayandırılması ilə bir çox qurum qapılarını bağlamalı oldu və bu səbəbdən tələbələr də daxil olmaqla, bir çox insan evindən işləməyə davam edərkən, onlayn öyrənmə və iş platformaları həyatımıza sürətli bir şəkildə daxil oldu. Bəs COVİD-19 müddətində xaricdə könüllülük proqramları davam edirmi və əgər davam edirsə onlayn şəkildə necə könüllü olmaq olar? Bu kimi bir çox suallarınıza bu məqaləmizdə təfərrüatı ilə cavab verəcəyik! Elə isə gəlin çox vaxt itirmədən ağla ilk gələn ən sadə sualdan başlayaq!
Könüllük Nədir?
Bu sualı ən sadə bir şəkildə cavablandırmalı olsaq, “sosial faydalı fəaliyyətdir” deyə bilərik. Şəxs heç bir qarşılıq gözləmədən bir işi sərbəst görməyi öhdəsinə götürərək bunu dövlət və ya özəl qurumlar vasitəsi ilə faydalanaraq edir. Günümüzdə dünyanın hər bir ölkəsindən hər bir fərdin iştirak edə biləcəyi müxtəlif sahələrdə minlərlə könüllü iş proqramları həyata keçirilir. Bu gün bütün dünyanı ələ keçirmiş mövcud pandemiya şəraiti ilə əlaqədar olaraq, könüllülük proqramlarıda öz fəaliyyətlərini onlayn olaraq davam etdirməkdədir. Karantin müddəti ərzində vaxtınızı səmərəli istifadə edərək, təcrübə və bacarıqlarınızı artıra biləcəyiniz beynəlxalq onlayn könüllülük proqramlarında iştirak edə bilərsiniz. Bu baxımdan indi sizin üçün evdən onlayn şəkildə könüllü ola biləcəyiniz proqramları təqdim edirik!
Ən Məşhur Beynəlxalq Könüllülük Proqramları Hansılardır?
Bu günlərdə bir çox qeyr-kommersiya təşkilatları onlayn könüllülərin köməyindən istifadə edir. Gün ərzində yalnız bir neçə saatınızı bu proqramlara sərf etməklə, siz öz CV-nizi gücləndirə, yeni bilik və bacarıqlar qazana bilə və beynəlxalq sertifikatlar əldə edə bilərsiniz. Könüllü olaraq iştirak edə biləcəyiniz proqramlar isə bunlardır:
Dünyanın ən əhatəli beynəlxalq təşkilatı olan Birləşmiş Millətlər Təşkilatının təşəbbüsü ilə yaradılan UNV proqramı onlayn şəkildə könüllülük proqramları vasitəsi ilə bütün dünyada sülh və inkişafa töhfə verməyi hədəfləmişdir. Proqramlar çərçivəsində siz COVİD-19 haqqında infoqrafikanın hazırlanmasından tutmuş, uşaq kitablarının ingilis dilindən yapon dilinə tərcüməsinə qədər bir çox geniş sahədə könüllülük imkanlarından faydalana bilərsiniz.
Dünyanın ən böyük muzey, tədqiqat və təhsil kompleksi olan Smithsonian İnstitutu tərəfindən yaradılan proqram onlayn könüllü olmaq istəyən tələbələr üçün əla təkliflər təqdim edir. Siz tarixi sənədləri köçürə, institutun artefaktları və tədqiqatları haqqında Vikipediya məqalələrini hazırlaya bilərsiniz.
Digər bir könüllü təşkilatı olan Red Cross (Qırmızı Xaç) dünyanın ən güclü humanitar təşkilatı sayılır. Təşkilat fəlakətlər zamanı köməyə ehtiyacı olan insanları tapmaq və Facebook kimi bir çox sosial media platformalarında mühüm yenilikləri paylaşmaq üçün onlayn könüllüləri axtarır və onlarla işləmək üçün imkanlar təqdim edir. Proqramlar haqqında daha ətraflı məlumat üçün linkə klik edərək proqramların rəsmi saytlarına daxil ola bilərsiniz.
Könüllü İş Proqramlarının Faydaları Nələrdir?
Könüllülük layihələri yalnız başqa insanlara fayda verən xeyriyyəçilik fəaliyyəti deyildir. Bu bütövlükdə cəmiyyətə daha böyük təsirlərdə fayda verən və tələbələr üçün daha geniş imkanlar və fürsətlər təqdim edən proqramlardır. Bu səbəbdən bir çox təşkilatlar ilin bütün aylarında tələbələrin həyatını zənginləşdirəcək, onların bilik və bacarıqlarını inkişaf etdirəcək və ən vacib olanı isə hərtərəfli şəxsiyyət kimi formalaşmalarında şərait yaradacaq və gələcəkləri üçün müsbət şəkildə fayda verəcək bir çox layihələr təklif etməkdədir. Bu proqramların bəziləri tələbələrin məzun olduqdan sonra işə qəbul olma imkanlarını daha da artırır, digərləri isə mükəmməl öyrənmə təcrübəsi təqdim edir. Könüllü proqramları tələbələrə məktəbdə və ya hər hansı bir iş yerində əldə edə bilməyəcəyi dəyərli bir təcrübə yaşadacaqdır. Sizinlə həmfikir olan insanlarla tanış ola və networking əlaqələrinizi genişləndirə bilərsiniz. Son olaraq isə sizlərə uğurlar arzu edirik!
Xaricdə təhsil suallaranızı bizə yaza bilərsiz.
Salam. Mən Əlibəyli Əfsanə. Azərbaycan Dillər Universitetinin Tərcümə(Azərbaycan dili-İngilis dili) fakultəsinin 3 cü kurs tələbəsiyəm. C1 səviyyəsində İngilis dili bilirəm. Könüllü olaraq fəaliyyət göstərmək istəyərdim. Xüsusilə də İxtisasım ilə bağlı fəaliyyətlərdə.
Salam Əfsanə xanım, məqalədə paylaşdığımız proqramların linklərinə daxil olaraq müraciət edə bilərsiniz. Uğurlar!